دير بالك لا يحوشك بو عبيد

بو عبيد انسان قصير القامه

عيونه دايما حمر وماخذين بالعرض شويتين

وييه محفر تقول حايشه يدرى من سنة الطواعين

وانكتبت له النجاة بس ظل الاثر

او مناقصه حفريات ماخذها الخرافى

ولي الحين ما خلصها كالعاده

الريال ادمى بس فيه عيب شرعى

وماى زمزم ما يطهره

عيونه كبريت لا لا ديناميت والمشكله انه يدرى

ومستانس على هل شى

اذكر قبل كم سنه كنا نتجمع عند واحد من الربع

وكان المذكور بو عبيد يتردد عنده دائما

اول ما يدش الديوانيه نعرفه من حركاته اذا كان مسوى

شى جديد ولا لا وللاسف كان كل يوم عنده ضحيه جديده


على فكره بو عبيد راعى بحر


فالحداقه كانوا يحاولون يراضونه عشان يسلمون من عيونه


واحد من ربعه شرى يخت

فعزم بو عبيد بالشاليه

ذبيحه وبيذان حمر ووجبه على اكمل وجه

بو عبيد عقب العزيمه طلع من الباب و نزل السلم يبى يمشى

وقفه الداعى وقاله اشرايك برفيجتى

وكانت فوق يم السلم عند باب الشاليه

قاله بل اطلق مرتى واخذها

طبعا ما صدقت خبر الضحيه ويات كفات من فوق السلم

كسر بالحوض كسر بالساق كسر بالكتف العمود الفقرى سلامتكم

صاحب بو عبيد يبكى وبو عبيد يتبوسم متظاهرا بالبراءة


حكايه ثانيه بس هالمره على مراى من نظرى

طالعين ثلاث طراريد بحر تسعين

ماشالله كان حداق حلو بس اللى بالطراريد الثانيه ما تهنوا

كل ما بغوا يتلون سمكه قالهم بو عبيد

بل تزعبون من جليب وطبعا السمكه ما تكذب خبر وتفتلت

بدرب الرده شغل المكاين ثنتينهم يميع

حد الدوسه وطلع من بين طرايد ربعه

التفت لنا وقال بل تقول ميراج

المكاين ما كذبوا خبر وقفوا ثنتينهم بنفس اللحظه

ولييه بحر غبه الدنيا اشته وليل وباقى الطراريد

انحاشوا وما الومهم يبون الفكه والسلامه

اشوه ان بو عبيد نفسه مهندس صلح المكاين

وهو يتبوسم ويقول كنى قلت فيهم


من كثرقصص بو عبيد الله يكافينا والسامعين شر عيونه

فكرت انشرهم على اجزاء كل جزء 30 حلقه

بس على 13 رمضان يالله يخلصون

الله يهداه يمكن حاسد عشره بالميه من سكان الكويت

ويقولون ما عندنا تكنولوجيا بالديره

اشنبى بالتكنولوجيا وعندنا وايد من نمونة بو عبيد

الله يكافينا والسامعين شرورهم

ملحوظه بعد نشر البلوق اخترب السيستم

والبلوق قام يترك

والصفحه تطلع فاضيه

الظاهر هلت بركات بو عبيد

بس على منو الله يكافيكم شر العناد

تحياتى

بوحمود